Car Rental Agreement - Terms and Conditions

Icelandic | Deutsch / German | English | Dansk / Danish | Français / French | Espagnol / Spanish

Icelandic

Skyldur leigutaka
1. Leigutaki samþykkir ákvæði leigusamnings þessa og hefur fengið afrit af honum.
2. Leigutaki skal skila ökutækinu:

a. ásamt öllum fylgihlutum (þ.m.t. hjólbörðum og verkfærum) í sama ásigkomulagi og það var við móttöku að undanskildu eðlilegu sliti vegna notkunar.
b. á tilskildum tíma samkvæmt samningi þessum nema um annað verði samið síðar.
c. til aðseturs leigusala nema um annað hafi verið samið.
d. með fullum eldsneytisgeymi af eldsneyti. Ef ökutæki er ekki skilað með fullum eldsneytisgeymi af eldsneyti er leigusala heimilt að gjaldfæra leigutaka fyrir það eldsneyti sem vantar til að geymir sé fullur ásamt þjónustugjaldi skv. verðskrá leigusala sem leigutaki hefur kynnt sér.

3. Leigutaki skal greiða fyrir eldsneyti og annað sem þarf til aksturs ökutækisins á meðan ökutækið er á hans ábyrgð, sem í skilningi leigusamnings þessa, er aldrei skemmri tími en þar til leigusali hefur skráð ökutækið móttekið í sínu kerfi, en slíkt getur einungis átt sér stað á opnunartíma skrifstofu leigusala.
4. Skili leigutaki ekki ökutækinu á réttum tíma samkvæmt leigusamningi þessum, eða láti vita um áframhaldandi leigu er leigusala eða lögreglu heimilt að taka ökutækið í sína vörslu án frekari fyrirvara, á kostnað leigutaka. Áframhaldandi leiga er háð samþykki leigusala. Skili leigutaki ökutækinu 1 klst. eða síðar eftir að samningstími rennur út er leigusala heimilt að innheimta allt að sólarhringsgjaldi samkvæmt leigusamningi þessum. Fyrir hvern sólarhring sem hefst eftir það er leigusala heimilt að innheimta gjöld samkvæmt verðskrá sem leigutaki hefur kynnt sér.
5. Ökutækinu skal stjórnað og ekið gætilega. Einungis þeir sem skráðir eru ökumenn á leigusamningi hafa leyfi til að aka ökutækinu. Leigutaki ber ábyrgð á tjóni sem leiðir af notkun ökutækisins og ekki fæst bætt af vátryggingarfélagi ökutækisins
6. Leigutaka er óheimill:

a. Akstur utan vega svo sem vegatroðningum og götuslóðum, um fjörur, forvaða eða aðra vegleysu.
b. Akstur á vegum sem eru F-merktir á opinberum kortum ásamt Kjalvegi (vegur 35), um Kaldadal (vegur 550) og Jökulhálsleið (vegur 570), nema bílar í flokkum 4x4 (fjórhjóladrifnir bílar) sem leigusali samþykkir að séu hæfir á slíkum vegum. Akstur á F-vegum 88 og 897 (Öskjuleið) og F249 (Þórsmörk) eru aðeins ætlaðir stærri jeppum og ekki ætlaðir minni 4x4 jeppum í flokkum “economy” og “intermediate”.
Brot gegn grein þessari heimilar leigusala að beita leigutaka févíti sem skal samsvara fjárhæð sjálfsábyrgðar, skv. verðskrá leigusala hverju sinni. Framangreint ákvæði um févíti hefur ekki áhrif á skyldu leikutaka til greiðslu skaðabóta vegna tjóns.
c. Akstur undir áhrifum hvers konar vímugjafa
d. Akstur í eða yfir ár eða hverskonar vatnsföllum. Framangreint bann gildir ekki um bíla sem leigusali samþykkir að séu hæfir til slíks aksturs, en slíkur akstur er þó alfarið á ábyrgð leigutaka, sbr. einnig i-liður 24 gr.
e. Notkunar ökutækisins er brýtur í bága við landslög og/eða ákvæði leiguskilmála þessara.
f. Akstur í snjósköflum og á ís.

7. Sé um árekstur eða óhappatilviljun að ræða, skal leigutaki tafarlaust tilkynna um atburðinn til viðkomandi lögregluyfirvalda svo og leigusala og má eigi yfirgefa staðinn, fyrr en lögregla er mætt á staðinn. Leigutaki skal fylla tafarlaust út tjónaskýrslur ef um tjón er að ræða. Tilkynni leigutaki ekki um tjón ber hann fulla ábyrgð á tjóni.
8. Þurfi leigusali að sækja eða láta sækja ökutækið vegna áreksturs eða óhappatilviljunar ber leigutaki allan kostnað vegna þess skv. verðskrá leigusala hverju sinni. Leigutaki hefur kynnt sér verðskránna.
9. Kílómetrafjöldinn (km) sem ökutækinu er ekið meðan samningur þessi er í gildi, ákvarðast með álestri á venjulegan kílómetramæli sem fylgir ökutækinu frá framleiðanda. Leigutaki skal tilkynna leigusala svo fljótt sem auðið er, ef kílómetramælirinn er eða verður óvirkur á leigutímanum.
10. Leigutaki samþykkir að greiða leigusala samkvæmt kröfu:

a. Geymslufé, ef um er að ræða, er nemi áætluðum leigukostnaði.
b. Öll útgjöld, sem leigusali verður fyrir, ef hann þarf að koma ökutækinu til baka til aðseturs leigusala hafi það verið skilið eftir eftirlitslaust, án tillits til ástands ökutækisins, vega eða veðurs.

11. Leigutaka er óheimilt að láta fara fram viðgerðir eða breytingar á ökutækinu og fylgihlutum þess eða leyfa nokkra veðsetningu á því án áður fengins samþykkis leigusala.
12. Leigutaki er ábyrgur fyrir öllum stöðumælasektum og sektum fyrir umferðarlagabrot.
13. Leigutaka er óheimilt að nota ökutækið til flutninga á farþegum gegn greiðslu, lána það eða framleigja.

Skyldur leigusala
14. Leigusali ábyrgist að reyna sitt besta til að ábyrgjast afhendingu ökutækis á umsömdum tíma og að það fullnægi kröfum sem gerðar eru um það.
15. Bili ökutækið vegna eðlilegs slits eða af öðrum ástæðum sem ekki eru af völdum leigutaka, skal leigusali afhenda leigutaka annað ökutæki svo fljótt sem auðið er eða sjá til þess að viðgerð fari fram svo fljótt sem auðið er, á þeim stað sem leigusali ákveður. Framangreint hefur ekki áhrif á greiðslu leigugjalds eða annars sem leigutaka ber að greiða samkvæmt leigusamningi þessum. Leigusali greiðir engar bætur í þeim tilvikum sem að framan greinir, hvorki vegna gistingar, né annars.
16. Leigusali skal kynna leigutaka efni leigusamnings þessa og sérstaklega þær skyldur sem hann tekur á sig með undirritun hans.
17. Leigusali skal, eftir fremsta megni, upplýsa erlenda leigutaka um íslenskar umferðarreglur,
umferðarmerki og reglur um bann við umferð utan vega. Jafnframt skal leigusali vekja
sérstaka athygli á hættu sem stafar af dýrum á vegum, malarvegum og ísilögðum vegum.
18. Vilji leigusali takmarka notkun ökutækis með hliðsjón af útbúnaði þess og/eða ástandi
vega skal það gert skriflega við undirritun leigusamnings þessa.
19. Leigusali ábyrgist að vera ávallt með gilda starfsábyrgðartryggingu
20. Leigusali er ekki ábyrgur fyrir hvarfi muna eða skaða á þeim, sem leigutaki, eða einhver annar
aðili, geymdi eða flutti í eða á ökutækinu.

Tryggingar
21. Innifalið í leigugjaldi eru lögboðnar ökutækjatryggingar, þ.e. ábyrgðartrygging og slysatrygging ökumanns og eigenda ásamt kaskótryggingu (CDW) með tiltekinni sjálfsáhættu skv. verðskrá sem leigutaki hefur kynnt sér.
22. Ábyrgðartrygging gagnvart þriðja aðila nemur þeirri upphæð sem íslensk lög kveða á um hverju sinni. Sjálfsábyrgð leigutaka vegna tjóns á ökutæki er allt að fullu verðgildi ökutækis, sbr. nánari tilgreiningu sjálfsábyrgðar á leigusamningi.
23. Leigutaki getur keypt lægri sjálfsáhættu með Super kaskótryggingu (Super CDW) skv. verðskrá sem leigutaki hefur kynnt sér. Sjálfsáhætta í hverju tjóni skal tilgreind í leigusamningi.
24. Það sem kaskótryggingin (CDW) og Super kaskótryggingin (Super CDW) ná ekki yfir:

a. Skemmdir af ásettu ráði eða sakir stórkostlegrar óvarkárni ökumanns.
b. Skemmdir sem verða þegar ökumaðurinn er undir áhrifum áfengis, örvunar, eða deyfilyfja, eða að öðru leyti ófær um að stjórna bifreiðinni á tryggilegan hátt.
c. Skemmdir vegna kappaksturs eða reynsluaksturs.
d. Skemmdir af hernaði, uppreisn, óeirðum, óspektum.
e. Skemmdir af völdum dýra.
f. Brunagöt á sætum, teppum eða mottum.
g. Skemmdir er aðeins varða hjól, hjólbarða, fjaðrir, rafgeymi, gler (annað en rúður), viðtæki, svo og tjón vegna stuldar einstakra hluta ökutækis og skemmdar sem af því stafa.
h. Skemmdir af akstri á ósléttri akbraut, svo sem á, gírkassa, drifi, öðrum hlutum í eða á undirvagni ökutækisins, skemmdir vegna þess á undirvagni er hljótast af því að ökutækið tekur niðri á ójöfnum akbrautum, svo sem hryggjum eftir veghefla, jarðföstu grjóti á akbraut eða við akbrautarbrúnir. Sama gildir um skemmdir er verða þegar laust grjót hrekkur undir ökutækið í akstri.
i. Skemmdir vegna aksturs þar sem bannað er að aka ökutækinu, svo og við akstur á vegatroðningum, götuslóðum, snjósköflum, ís, yfir óbrúaðar ár eða læki, um fjörur, forvaða eða aðra vegleysu. Þó bætir trygging skemmdir er verða þegar ökumaður hefur sannarlega neyðst til að fara út af akbraut, t.d. vegna viðgerðar á vegi.
j. Skemmdir á fólksbílum sem verða við akstur á vegum sem eru F-merktir á opinberum kortum og þeim vegum er tilgreindir eru í lið 6.b.
k. Skemmdir á 4x4 jeppum í flokkum “economy” og “intermediate” sem verða á F-merktum vegum og öðrum vegum tilgreindum í lið 6b.
l. Tjón af völdum þess að sandur, möl, aska, vikur eða önnur jarðefni fjúka á ökutækið.
m. Vatnsskaða á ökutæki.
n. Ef ökutækið er flutt sjóleiðina bætist ekki tjón af völdum sjóbleytu.
o. Að öðru leyti vísar í almenna skilmála fyrir kaskótryggingu.

25. Leigutaki getur að auki keypt Grand kaskótryggingu skv. verðskrá. Sjálfsáhætta í hverju tjóni skal tilgreind í leigusamningi.

a. Grand kaskótrygging (Grand CDW): innifelur Super kaskótryggingu (Super CDW) og að auki nær hún yfir tjón á rúðum, framljósum og lakki bifreiðar sem orsakast af því að möl eða grjót kastast á leigutækið frá öðrum bifreiðum á malarvegum. Einnig nær hún yfir tjón á undirvagni leigutækis, s.s. pústkerfi, gírkassa og vél ef leigutæki tekur niðri á almennum vegi eða F-merktum vegum fyrir þau leigutæki sem hæf eru fyrir þá sbr. lið 6 b hér að ofan.
b. Almennir fyrirvarar kaskótryggingar (CDW og Super CDW) tilgreindir í liðum 24 a til n gilda einnig um Grand kaskótryggingu (Grand CDW) að undanskildum lið 24 h og gleri í lið 24 g.

Almenn ákvæði
26. Leigusamningur ásamt þessum leiguskilmálum skulu ávallt vera í ökutækinu meðan á leigutíma stendur.
27. Viðaukar og breytingar á leiguskilmálum og ákvæðum leigusamnings skulu vera skriflegir.
28. Leigusala er heimilt að gjaldfæra á greiðslukort leigutaka leigugjald og annað sem leigutaka ber að greiða samkvæmt leigusamningi, svo sem greiðslur vegna tjóns sem verður á ökutæki á meðan það er í vörslum leigutaka, og skal leigusali einn hafa ákvörðunarvald um hvenær það skuli gert, og hvort það sé gert í einu lagi eða ekki. Réttur þessi stendur óhaggaður í 6 mánuði eftir að ökutæki hefur verið skilað til leigusala.
29. Leigutaki staðfestir með undirritun sinni á leigusamning og leiguskilmála að hafa tekið við ökutækinu og fylgihlutum í góðu ásigkomulagi.
30. Ef tjón verður á ökutæki á meðan leigutíma stendur vegna áreksturs eða sökum annarra atvika, á leigutaki því aðeins rétt á nýju ökutæki innan samningstíma, ef liggur fyrir að tjónið verði bætt samkvæmt ákvæðum leigusamnings og kaskótryggingu ökutækis sbr. 21 gr. Ef tjón verður sem fellur ekki undir kaskótryggingu ökutækis sbr. 24. gr. fæst ekki nýtt ökutæki út samningstímann fyrir leigutaka, sem og ef tjóni er valdið af leigutaka með stórkostlegu gáleysi eða ásetningi leigutakans eða fellur undir 6. gr. leiguskilmála.
31. Um samninga þá sem gerðir eru á grundvelli ofangreindra skilmála, þar með talið bótakröfur sem eftir atvikum kunna að vera gerðar, fer að íslenskum lögum. Gildir það bæði um grundvöll og útreikning bóta. Sama gildir um bótakröfur á grundvelli bótaábyrgðar utan samninga.
32. Bent skal á að skjóta má ágreiningsmálum samningsaðila leigusamnings til starfandi úrskurðarnefndar Neytendasamtakanna, Samtaka ferðaþjónustunnar eða Neytendastofu.
33. Ef ágreiningur kemur upp um túlkun eða framkvæmd samnings þessa munu aðilar leggja sig alla fram við að leysa þann ágreining með samkomulagi. Náist ekki samkomulag má reka dómsmál vegna ágreiningsins fyrir Héraðsdómi Reykjavíkur.

  • Keflavik Airport Location
    Blikavollur 3
    235 Reykjanesbaer
    Tel.: +354 515 7110
    Fax: +354 515 7167
    Opening hours
  • Reykjavik Location
    Bildshofdi 8
    110 Reykjavik
    Tel.: +354 515 7110
    Fax: +354 515 7167
    Opening hours
  • Akureyri Location
    Tryggvabraut 5
    600 Akureyri
    Tel.: +354 515 7110
    Fax: +354 462 7635
    Opening hours
  • General Information
    Dollar Thrifty independent licensee in Iceland is Brimborg
    booking@dti.is
    Reg. No: 701277-0239
    Emergency tel.: +354 515 7110